Э.Эрдэнэ-Очир

Энэ асуулт сүүлийн хагас жилийн хугацаанд Хятадын дотоодод болон бүс нутаг, олон улсын анхаарлын төвд байж хариултаа хүлээсээр байна. 

Уламжлал ёсоор ХКН-ын 20 дугаар Төв хорооны 300 гаруй гишүүд 2023 оны намар Гуравдугаар Бүгд хурлаа хийж, ирэх 5-10 жилийн хөгжлийн бодлогоо, нэн ялангуяа нийгэм, эдийн засгийн хөгжил, шинэчлэлийн зорилтуудаа тунхаглан батлах ёстой байсан юм. Гэвч ХКН-ын Төв хороо хуралдсангүй, хуралдахаар тов зарлаагүй байгаа нь “хүлээлт, тодорхойгүй байдал” үүсгэжээ. 

Бүгд хурлыг хуралдуулах шийдвэр гаргах эрх бүхий элитүүд буюу ХКН-ын Төв хорооны Улс төрийн товчооны 24 гишүүн тодорхой асуудлаар байр суурийн зөрүүтэй байж магадгүй нь үүний нэг шалтгаан аж. Учир нь 2023 оны 7-р сард Гадаад хэргийн сайд Цинь Ган, 10-р сард Батлан хамгаалахын сайд Ли Шанфу нар огцорч, нам, төрийн албан тушаалаасаа буусан бөгөөд ХКН-ын дүрмээр Төв хорооны Бүгд хурлаар тэднийг намын албан тушаалаас хасаж орны хүмүүсийг сонгох, томилох ёстой.

Зөвхөн шинэ хүмүүсийн томилгоо төдийгүй уламжлалыг эвдэж гурав дахь удаагаа сонгогдсон БНХАУ-ын дарга Си Зиньпиний асуудлаар ч бүлэг фракцууд бүрэн зөвшилцөлд хүрээгүй, сэтгэл дундуур байгаа бололтой.

Энэ онд Дэн Сяопиний “Нээлттэй хаалганы бодлого”-ын 45 жилийн ой тохиож буй тул ХКН-ын удирдлагууд өнгөрсөн алдаа оноогоо үнэлж дүгнэн, шинэ эрин үеийн шинэ стратегиа тодорхойлохын тулд тус хуралд ач холбогдол өгч хойшлуулж байж магадгүй гэсэн таамаг ч байна.

Ийнхүү ХКН-ын Төв хорооны Гуравдугаар Бүгд хурал хойшилсоор буй нь тус улсын дотоодод хүлээлт үүсгэж, харин бусад улсуудын хувьд Хятадын улс төр дотроо өрнөл, тэмцэлтэй байна гэж таамаглахад хүргэж байна.

Эх сурвалж: The Diplomat, Bloomberg, Asia House